Россия-Кыргыз өнүктүрүү фондунун төрагасы Эркин Асрандиев бүгүн (31-августта) Ысык-Көлдү сүзүп өтүп баратып дайынсыз жоголгон. Э.Асрандиевдин жакын тууганы: «Саат 18:00дөр чамасында жоголду. Анын жанында коштоп жүргөн кайык бар болчу. Эки метрге жеткен толкун болгондон кийин аны таппай калышкан. Асрандиев буёкту байланып сүзүп бараткан», — деп тынчсызданып, “Спутникке” билдирген.
Өкмөт башчы да тынчсызданып, буйрук берди…
Өкмөттүн басма сөз кызматынын жетекчиси Чыңгыз Эсенгуловдун билдирүүсүнө караганда, бул окуя премьер-министрдин жеке көзөмөлүндө. Анын айтымында, премьер-министр Мухаммедкалый Абылгазиев да тынчсызданып, ал Өзгөчө кырдаалдар министри Нурболот Мирзахмедовго жана башка тийиштүү ведомстволорго Россия-Кыргыз өнүктүрүү фондунун төрагасы Эркин Асрандиевди Ысык-Көлдү сүзүп өтүү маалында дайынсыз болгондугуна байланыштуу издөө иштерин активдүү жүргүзүүнү буйрук кылып, бардык күч-аракетти жумшоону тапшырган.
Эркин Асрандиев буга чейин НТС телеканалына интервью берип, сууда жакшы сүзөрүн айтып берген. Аны төмөндөгү ВИДЕОдон көрүңүз!
Күнайым КУБАНЫЧБЕК кызы