90 жылдыкты утурлай…
Ыр окуу эстафета кербени уланууда…
Кыргыз Эл акыны Байдылда Сарногоевдин 90 жылдыгын утурлай, биздин сайт (Алакан биз — alakan.biz) «Байдылда Сарногоевдин ырларынан көркөм окуу» эстафетасын 12-майда баштаганбыз. Кудай жалгап, эстафетанын кербени тыным албай уланууда…
Эстафета башын Жогорку Кеңештин депутаты Руслан Жакышов баштап берип, эстафетаны 4 адамга (кесиптештери Нуржигит Кадырбековго, Марат Мураталиевге жана мыкты акындар, достор Жыргалбек Касаболотов менен Шабдан Сулаймановго) узаткан. Акындарыбыз дароо кабыл алып, эртеси эле жооп кылып, эстафетаны андан ары узатышкан.
Эрнис АСЕК уулу: «Байдыкенин каргасындай «Ка-ак живешь поэт» дегенге жарабады»
Байдылда атабызды жана ырларын байым аябай жакшы көрчү. «Байдыкенин ырларын угуу үчүн акындар менен отурган жерине Жыргалбек экөөбүз көп бардык. Эл акынын эл укмуш курчап алып, ырын муюп укчу. Ырына да, сөзүнө да моокумубуз канбай калып, үйүнүн эшигинин алдына чейин ээрчип барчубуз…» деп эскерип калчу… Көзү тирүү болгондо Байдылда атабыздын бир ырын окумак деп ойлойм. Ошондон улам, 9 жыл мурун жазганын берип коюуну туура көрдүм.
Записки от скуки
КАРЫЗ
«Тигиге мынча, буга мынча, баягыгы түкүнчө сом карызмын» деп саресепке сала баштады. Азыр кыргыздын баары ушинтип жашап жатышат. Мен күндү ойлодум. Ал берген жарыкты ойлодум. «Адамзат асмандагы Күнгө алмустактан бери берип келаткан жарыгын кайтарып берсе, баарыбыз карыздардан кутулмак болчубуз» деп жибериптирмин. Дегенимди учуп бараткан карга гана укту. Байдыкенин каргасындай болуп «Ка-ак живешь поэт» дегенсип, «карк» этип койгонго жарабады. Азыр кушунан бери тескери болгон заман келгенби дейм…
Эрнис АСЕК уулу
«Баягы Асаба», 2013-жыл
Байымдын Баатыры…
КЫРГЫЗЫМА
Байыртан болгон билими,
Байыртан болгон илими.
Элдерди мактап өзүңдү,
Алардын кылба кийини.
Кылымдар ачпай сабатты,
Кармабай калем, кагазды.
Караңгы болуп жүрсөң да,
Мекендеп түрлүү тарапты.
Мен туулган доорго жеткирдиң,
Мээңе сактап «Манасты».
Эзелдеп ачпай сабатты,
Эч билбей калем, кагазды.
Кой менен кошо жүрсөң да,
Конуштап түрлүү тарапты.
Түптүгөл бизге жеткирдиң,
Тилиңе басып «Манасты».
Мактагым келет күндө эле,
Басынтып өзүң сүйлөбө.
Эпосун ойдо жат билген,
Элдер аз сендей дүйнөдө.
Эки мыкты акын достун мамилесинен мен Байдылда Сарногоев менен Мидин Алыбаевдей достукту байкадым. Жыргалбек, Шабдан, ылайым достугуңар арта берсин. Ар бир баскан изиңерди ийгилик коштосун! Өйдөдө өбөк, ылдыйда жөлөк болуп келаткан алтындай болгон сиңдим Салима уюштуруп жаткан эстафетаны да четке какпай, колдоп бергениңерге да терең ыраазычылык билдирем. Бул дагы болсо Байдылда атабызга болгон сый-урматыңар. Бар болгула, кыргызымдын жигиттери!
Толкундай бол, кыргыздын жигиттери.
Тоолук эне төрөгөн сени, мени!
Назира СААЛИЕВА
P.S. «Ыр окуу эстафета кербени» мамлекеттик деӊгээлде, республикалык масштабда күзүндө өткөрүлө турган мааракеге чейин уланат. Залкар акын Байдылда Сарногоевдин «Ашуудан берген отчетум» ыр жыйнагындагы ырларынын баарын окуп салалычы, туугандар!