Жарык көргөн 50 китеп. Кимдердики чыкты? (Тизме, видео)

Айтылган иш-чарага президенттин кеңешчиси Чолпонбек Абыкеев, Министрлер Кабинетинин төрагасынын орун басары Эдил Байсалов, Маданият, маалымат, спорт жана жаштар саясаты министринин орун басары Айнура Аскарова, Жазуучулар союзунун төрагасы Каныбек Иманалиев катышып, алгач китептери чыккан авторлорду куттуктап сүйлөп, анан жарыкка чыккан китептердин кызыл лентасын кесип, китептерди четинен колдоруна алып барактап чыгышты.

13-июнь — жолдошум жарык дүйнөгө келген күн. Туулган күнүнүн алдында болгон бул иш-чарада, «өзү аман болгондо чоң белек болмок, китепти колуна кармап кубанмак да» деп ичим туз куйгандай ачышты… Ага кошул-ташыл жанга демөөр ушул жакшы иштин бардык түйшүк-машакатын аткарып, китептердин чыгышына чоң салым кошкон Жазуучулар союзунун мурдагы жетекчиси, мыкты акын Нурлан Калыбековдун чакырылбай калганына да аябай жаман болдум. «Эмне келген жоксуң?» деп телефон чалсам, «мага эч ким айткан жок» десе жаман абалда калдым. Кызматта турганда сыйлаганды билип, кызматтан кеткенде сыйлаганды унутуп калабызбы деп кызыктай болдум…

Чынында бул иш-чара башында болгондордун арасында Нурлан да болушу керек эле…

«Нурлан жазуучулар союзуна каражат бөлдүрөм, акын-жазуучулардын китебин чыгаруу маселесин чечем деп канча бут кийимин жыртты. Бюрократиядан бир майнап чыгаруу да азап иш. Нурлан союзда жакшы иштеди, жакшы из калтырды» деп ТҮРКСОЙдун баш катчысы, Кыргыз эл жазуучу, драматург Султан (Раев) агам жазгандай, Нурлан Жазуучулар союзунун ишин жандантам, каржы маселелерин чечем деп далай чуркады… ушул 50 китептин чыгышына чоң салым кошту… анан чакырылбай калганы туура эмес болуп калды. 50 китептин авторлорунун айрымдары деле ушундай пикирлерин айтып жатышты.

Садыр ЖАПАРОВ: «Кийинки муунга көрүлгөн камылга»

1. Бекмамбет Атаканов,               “Тайгада калган өмүр”
2. Бекмамбет Атаканов,      “Томь дайра”
3. Т.Шайдуллаева, “Бак” (аңгемелер)
4. Бейшебай Усубалиев, “Жомок” (повесть)
5. Элмира Ажыканова,  “Дубал саат” (аңгемелер)
6. Жумабек Токтогазиев, “Белгисиз адамдын жазгандары” (аңгемелер)
7. Калчоро Көкүлов, “Жата конок” (повесть)
8. Папан Дүйшөнбаев, “Мотойнаама” (повесть, аңгемелер)
9.  Махабат Саидрахманова , “Шаарчадагы жаз” (аңгемелер)
10. Абдиламит Матисаков (түзүүчү), “Миң булак” (жаш жазуучулардын аңгемелери)
11. Токтош Абдиева, “Жүрөктөгү тамчылар”(аңгемелер)
12. Рыспек Адиев, “Күндү тоспо” (повесть)
13. Мамат Сабыров, “Ырчы менен корбашы” (аңгемелер)
14. Гүлзада Станалиева, Нарсулуу Гургубаева (түзүүчү),  Жаштар прозасы (аңгемелер)
15. Бермет Алымбаева, “Бешик” (аңгемелер)
16. Алтынай Темирова, “Кайыр кош каран түн” (повесть)
17. Жыпаркүл Исабаева, “Сарала” (повесть)

 КОТОРМОЛОР (проза)

1. М.Булгаков, “Мастер менен Маргарита”, роман (которгон Эрнис Асек уулу)
2. Р.Акутагава, “Түнт токойдун койнунда”, аңгемелер (которгон Т.Чакиев)
3. Т.Китано “Кикудзиро менен Саки”, повесть (которгон Ф.Исанова)  
4. К.Төрөмурат, “Кара китеп”, аңгемелер (которгон Т.Жороев)     
5. Т.Крюкова, “Костя Ника”, повесть (которгон М.Ааматов)
6. Лобсанг Рампа, “Үчүнчү көз” (которгон М.Сатыбалдиев)
7. О’Генри, “Акыркы жалбырак”, аңгемелер (которгон Э.Шоруков)
8. Н.Думбадзе, “Талико”, аңгемелер (которгон А.Өмүрканов)
9. Луи Буссенар, “Бриллиант уурдагандар”, роман //               Г. Хаггард  “Сулайман падышанын кенчи”, роман (которгон Кубанычбек Аркабаев)

КЛАССИКАГА АЙЛАНГАН КОТОРМОЛОР               (кайра басуу)

 1. Ж.Лондон, “Мартин Иден”, роман (которгон Ж.Султаналиев)

2. Р.Гамзатов, “Менин Дагестаным”, роман (которгон А.Токтогулов)

3. И.Калашников, “Каар заман”, 3 китептен турган роман (которгон К.Ботояров)

4. Я.Кавабата, “Миң канаттуу турна”, роман (которгон Ш.Келгенбаев)

5. С.Цвейг, “Бейтааныш аялдын каты”, новелла (которгон А.Жакыпбеков)

6. В.Шукшин, Тандалган аңгемелер жана киноповесть (которгон С.Наматбаев)

7. В.Распутин, “Эсен болуп эстей жүр”, повесть (которгон М.Төлөмүшов, Б.Кубатбеков)

8. Ромен Роллан, «Кола Брюньон. “Эсил кайран али тирүү”, повесть (которгон О.Орозбаев)

9. Хуан Хименес, “Платеро жана мен” (которгон М.Абакиров)

10. М.Сервантес, “Шумдуктуу Дон Кихот” (которгон С.Бөлөкбаев)

БАЛДАР АДАБИЯТЫ (котормолор)

1. Дүйнө элдеринин жомоктору (которгон Б.Асаналиев)
2. Льюис Кэрролл, “Алисанын укмуштуу жоруктары” (которгон А.Эгембердиева)
3. Жапан эл жомоктору (которгон А.Абдылдаева)
4. Антуан де Сент-Экзюпери, “Кичинекей ханзаада” (которгон С.Жигитов)

БАЛДАР АДАБИЯТЫ (жарыялана элек чыгармалар)

1. К.Соорбекова, “Эки бөжөк” аңгемелер
2. Ы.Кадыров, “Камчы” аңгемелер
3. Н.Сакыева, “Кереметтүү жомоктор”
4. Бек Жылдыз, “Гопстоп же биздин зебрабыз” аңгемелер
5. Р. Шүкүрбеков, «Иттин жомогу»
6. Ш.Бейшеналиев, «Мүйүздүү козу»
7. К. Эсенкожоев, “Үчүнчү шар”

«Сен китепти ачсаң, китеп сени ачат»

деп залкар жазуучубуз Чыңгыз Айтматов жазгандай, мурда жана жакында жазылып жарык көргөн жапжаңы 50 китепти ачып окусаңыздар, бир топ ачылыштарды жасай турганыңыздарга ишеним чоң!

«Китепсиз өскөн бала, суусуз өскөн даракка окшош» дегендей, жетилип келаткан чырпыктарды чынар терекке жеткирүү үчүн адабий агымдан суу куюп, жаштайынан китеп окутуп, мурунку жарык муун ысымдарын таанытып келечекке кам көрүү аракетин жасап жаткан мамлекетке ыраазычылык билдиребиз. «Жакшы китеп жазганың, элдин көөнүн ачканың» дегендей, жакшы китеп жазып, элдин жарпын ачып, адабият, кыргыз тилин өнүктүрүүгө чоң салым кошкон котормочуларды, жазмакерлерди да куттуктайбыз! Чыгармачылык жигер, алака токтобосун!

Орус жазуучусу, драматург, врач, театр режиссеру Михаил Булгаковдун (1891-1940) уникалдуу да, чуулгандуу да  чыгармасын Орто Азияда роман алгачкы жолу которуп кеткен  жолдошум Эрнистин жаткан жери жайлуу болсун!

Назира СААЛИЕВА