Аида НАДЫРБЕКОВА: «Бабыр байке биз менен сыймыктанчу»
— Бабырбек байке бизге бир тууган агабыздай эле болчу. Биз «Алиби» гезитинин 1-номерин жарыкка чыгаргандарбыз. Биринчи номурун даярдап жатканда, «жакшы гезит болсун, элге жугумдуу болсун» деп Бабырбек байке дагы абдан изденип, толгонду. Кийин чынында эле элдин оозуна алынган гезиттердин катарын толуктабадыбы. Бул үчүн мен ар дайым сыймыктанам. Бабырбек байке бизди «менин кыздарым» дечү, мактанып, сыймыктанып айтчу. Башкы редактор Элнура Кулуева, мен, Чынайым Кутманалиева, Элмира Мадиева, Урмат Иманалиев болуп болушунча иштеп бердик. Гезиттин тиражы кыска убакытта 7000ден ашканы биз үчүн тоодой эле эмгек болгон.
Бабыр байкенин жубайы Таалай эже дагы кубаттап, колдоп турду. Эжени жакшы көрөбүз, себеби, бизге өз эжебиздей эле камкордук кылды.
Өкүнүчтүүсү, Бабырбек байкенин күтүүсүз каза болуп калгандыгы болду. Асылган оору акыры алып тынбадыбы. Ооруп жатып калганда барып, абалын сурай алган жокмун. Жүрөгүм даабады. Жакшы адамдарды жакшынакай элеси менен эстеп калгым келет. Бабырбек байке дагы жакшы адамдардын бири болчу…
Бабырбек байкеге аргасыздык болуп калган учурларда кеңеш сурасаң, жок дебей, убактым аз дебей жардам кылууга даяр болчу. Телефонун албай койгон адамдардан эмес эле. Бабырбек байке ушундай турпаты менен менин көз алдымда калды.
Чынайым КУТМАНАЛИЕВА,
«Майдан» гезити