Эсен болуп, эстей жүр!
Жогорку Кеңештин Аппаратынын басма сөз кызматынын мурдагы жетекчиси, Кыргызстандын Ооганстандагы мурдагы элчиси Мирослав Ниязовдун бир тууган иниси Ниязов Эмил Жумабекович бүгүн (12-сентябрда) 68 жашында көз жумду. Маркум акыркы сапарга 13-сентябрда узатылат.
Дареги: Бишкек шаары. 6-кичирайон, 16-үй. Коштошуу зыйнаты саат 11:00до башталат.
Эмил Жумабековичти журналисттердин көпчүлүгү жакшы билет. Алардын социалдык тармактарга жазган эскерүүлөрүн беребиз.
Жыпара АРЫКОВА: «Жетекчимин деп каада күтпөгөн адам эле…»
Кипариса СУРАХМАНОВА: «Кеменгерлигиңиз менен эсибизде каласыз»
Назира СААЛИЕВА: «Жигиттин гүлү» деп Кусеин Исаев да жакшы көрчү»
— Эмил Ниязов байкенин акка моюн сунганын угуп алып аябай жаман болдум…
Бул ааламды өзү да аалам адам таштап кетиптир…
Жакшы адамдар жөнүндө эскерүү жазуу кандай гана оор, кыйын! Ушул жылдын жаз айында мударис агайыбыз Исаев Кусеин Исаевич өтүп кетти эле… Эми Эмил байке..
Эмил байке менен агайым тааныштырды эле… Анда 1993-жыл болчу. Ал кезде Политех, азыркы КМТУда мугалим, мен лаборантка болуп иштечүмүн. Орус, кыргыз тилинде бирдей жакшы сүйлөгөн, жазган мыкты мугалим болчу. Студенттер да, чогуу иштеген биз дагы жакшы көрчүбүз. «Жигиттин гүлү» деп Кусеин Исаевич да жакшы көрчү. Кусеин агай Бишкек гуманитардык университетке «Башкаруу жана социология» факультетин ачып жатканда, факультеттин ачылышына чоң салымын кошкон экен… Студенттерди, дегеле бир адамды урушканын көргөн жокмун. Сылык, жөнөкөй, адамгерчилиги бийик адам болчу…
Кийин Бишкек гуманитардык университетин аяктап жатканда саясий партиялар боюнча диплом жазып калдым. Анда Эмил байке Жогорку Кеңештин басма сөз кызматында иштеп калган. «Жакшы тема тандапсың. Партиянын лидерлерине жолук, сөздөрүн ук» деп бир топ саясатчыларга жолуктурду эле. Байкенин жардамы менен диплом жакшы жазылган. Кесибим менен иштебей, алгач кытайлар ачкан «Исткомпейдж» пейджер компаниясында иштеп калдым. Бир күнү жумуштан чыгып баратып жолугуп калдым. «Кайдасың?» деп сураганда, «ушул жерде оператор болуп иштеп жатам, айлыгы жакшы» десем, «Я тебя люблю», «Сюда приходи, туда приходи» деген жиндилердин СмСтерин жеткирип отурасыңбы? Сен иштей турган жер эмес. Кытайлардын акчасына кызыкпа! Эртең Жогорку Кеңешке кел!» деп аябай ачууланды… Айткан убагына бардым. «Мен Кыргыз радиосуна» сүйлөшүп койдум, ошол жакка бар, журналистиканы радиодон башташ керек. Парламент кабарчысы болосуң. Кесибиң политолог эмеспи…» деп радиого жиберди. Ошентип Эмил байкенин арты менен журналист болуп калгам. Болбосо башка кесипте жүрө берет белем, ким билет?! Бир тууган карындашындай мамиле кылчу, дегеле мага эле эмес, бардыгына…
Көп нерсени жазсам болот эле… Көздөн жаш токтобой, ушуларды эстеп, араң жаздым. Жакшы адамдар тууралуу эскерүү жазуу кандай гана азап, кайгы!
Эмил байке, канча бир элге жактыңыз, эми жерге жагыңыз. Алла таалам бейиштен жай берсин!
Баскан жолу
Эмил Ниязов 1955-жылы 27-июнда Ош облусунун Ленин-Жол айылында туулган. Жогорку билимдүү. Ленинграддагы Ленин жана Эмгек Кызыл Туу ордендүү мамлекеттик университетин аяктаган. Эмгек жолун Ош облусунун Ленин районунун прокурорунун аппаратынын катчысы болуп иштөөдөн баштаган.
1995-жылы Жогорку Кеңештин Мыйзам чыгаруу жыйынынын аппаратынын ишин салыштырма талдоо борборунун улук консультанты болгон.
2000-2009-жылдары — Жогорку Кеңештин Мыйзам чыгаруу жыйынынын Аппаратынын коомдук-саясий талдоо жана болжолдоо секторунун башчысы, Жогорку Кеңештин Мыйзам чыгаруу жыйынынын төрагасынын басма сөз катчысы, басма сөз кызматынын жетекчиси болуп эмгектенген. 2022-жылы ардактуу эс алууга чыккан.