ИИМдин басма сөз кызматы билдиргенине караганда, бүгүн Нарын суусуна боюн таштап, өз өмүрүн кыйууга аракет кылган энени милиция кызматкери менен шаардык тургун куткарып калышкан.
Окуя мындай болгон. Бүгүн эртең мененки 9:25 чамасында Нарын РИИБдин айдоочу, милициянын ага сержанты Жаныбек Асанбеков “102” кызматына чалып, Нарын шаарынын Боогачы көчөсүндө жайгашкан автобазанын тушундагы Нарын суусунда болжол менен 75-80 жаштагы карыяны сууда агып бара жаткан жеринен куткарып калышкандыгын билдирген. Окуя болгон жерге Нарын ШИИБдин кызматкерлери барган учурда, 1940-жылы туулган Нарын шаарынын К.И. аттуу тургуну белгисиз себептерден улам өзүн-өзү өлтүрүү максатында Нарын суусуна түшүп кеткендиги маалым болгон.
Ал эми К.И. аттуу эне милиция кызматкерлерине үйүнөн чыгып, Нарын суусунун жээгине барганын, андан соң өзүн жаман сезип, өзүн-өзү өлтүрүү максатында сууга түшкөнүн билдирген. Анын мындай аракетине эч ким күнөөлүү эместигин кошумчалаган.
Күнайым КУБАНЫЧБЕК кызы